अमेरिकी सर्वोच्च अदालतले दियो ट्रम्पलाई छुट

समाचार बिज
  • ख-
  • ख+

वाशिङ्गटन । अमेरिकाका पूर्वराष्ट्रपति डोनाल्ड ट्रम्पविरुद्ध परेको मुद्दामा त्यहाँको सर्वोच्च अदालतले सोमबार उनलाई महत्वपूर्ण राहत दिँदै फैसला गरेको छ । क्यापिटल हिल दंगा मामिलामा फैसला गर्दै अदालतले ट्रम्पलाई केही हदसम्म इम्युनिटी (छुट) हुने फैसला गरेको छ ।

फैसलाका क्रममा ६ जना न्यायाधीशहरू पक्षमा र ३ जना विपक्षमा रहेका थिए ।

उक्त फैसलामा ट्रम्पलाई उनको आधिकारिक कामका लागि अभियोजनबाट छुट रहेको र उनका अनधिकृत कामका लागि कुनै छुट नहुने जनाइएको छ । यद्यपि, के काम आधिकारिक र के अनधिकृत भन्ने छुट्याउने काम तल्लो अदालतलाई जिम्मा दिइएको छ ।

यस विषयमा सर्वोच्चले केही दिशा निर्देश भने गरेको छ । ट्रम्पका निजी दस्तावेजलाई प्रमाणको रूपमा पेस गर्न नसकिने जनाइएको छ ।

असहमति व्यक्त गर्ने तीन लिबरल न्यायाधीशमध्ये एक सोनिया सोटोमेयरले यो फैसलाबाट राष्टपति अब कानुनभन्दा माथि राजा भएको जनाएकी छन् ।

राष्ट्रपति चुनावभन्दा पहिला आएको यो फैसलालाई ट्रम्पको ठूलो जीतको रूपमा हेरिएको छ । क्यापिटल हिल दंगा र २०२० को राष्ट्रपति चुनावको नतिजा उल्ट्याउन भएको ट्रम्पको मुद्दामा अब तल्लो अदालतमा सुनुवाइ हुनेछ ।

फैसलाले रिपब्लिकनमा खुसी ल्याएको छ । एरिजोनाका रिपब्लिकन सिनेटर मार्शा ब्लैकबर्नले लेखेका छन्, ‘सान्दार खबर । कानुनले एक अवैध उत्पीडनलाई धराशायी गरिदिएको छ ।’

डेमोक्रेटिक पार्टीले यो फैसलामा कडा प्रतिक्रिया दिँदै डेमोक्रेटिक रिप्रेजेन्टेटिभ गैरी कोनोलीले ‘यो एक शर्मनाक फैसला भएको र आउने वर्षहरूमा यसले सताउने’ बताएका छन् ।

बाइडेनको प्रतिक्रिया : खतरनाक उदाहरण
फैसलामा राष्ट्रपति जो बाइडेनले खतरनाक उदाहरण भएको जनाउँदै फैसलाले कानुनी शासनको मान्यतालाई कम आँकेको जनाएका छन् ।

उनले यो फैसला अमेरिकीहरूका लागि डरलाग्दो विकृतिको रूपमा आएको समेत जनाएका छन् । उनको क्याम्पेनले पनि  ६ जनवरीमा जे भयो यो फैसलाले त्यो कुरा नबदल्ने बताएको छ ।

बाइडेनको प्रचार क्याम्पेनका तर्फबाट दिइएको वक्तव्यमा २०२० को चुनाव हारेपछि जे भयो त्यो तथ्य नबदलिने बताएको छ । क्याम्पेनले ट्रम्प लोकतन्त्रका लागि खतरा भएको बताउँदै आएको थियो ।

ट्रम्पले भने यो फैसलाको स्वागत गर्दै प्रजातन्त्रको ठूलो विजय भएको बताएका छन् ।

कुनै सल्लाह, सुझाव वा प्रतिकृयाको लागि samacharbiz@gmail.com मा इमेल पठाउन सक्नुहुन्छ ।
प्रतिक्रिया दिनुहोस्