पोखरा महानगरलाई लेखा समितिको निर्देशन: बेरुजु नतिर्नेको तीनपुस्ते सार्वजनिक गर

पोखरा । पोखरा महानगरपालिकामा ३ अर्ब ३ करोड ९१ लख १३ हजार रुपैयाँ बेरुजु छ । महालेखा परीक्षकको प्रतिवेदन अनुसार अघिल्लो आर्थिक वर्ष २०७९-८० मा मात्र ७९ करोड ४९ लाख ८० हजार रुपैयाँ बेरुजु थपिएको छ ।

हरेक वर्ष बेरुजु थपिने र फर्स्यौट नहुने अवस्था बढेपछि महानगर अन्तर्गतको सार्वजनिक लेखा समितिले बेरुजु नतिर्नेको तीनपुस्ते सार्वजनिक गर्न निर्देशन दिएको छ । समितिको बैठकले असुल गर्नुपर्ने बेरुजु नतिर्नेहरूको तीनपुस्ते सार्वजनिक गरेर भएपनि रकम उठाउन भनेको हो ।

समितिका सभापति झपट रानाभाटले बेरुजु भ्रष्टाचारको एउटा पाटो भएकाले भ्रष्टाचारमुक्त महानगर बनाउन यस्तो गरिएको सुनाए । समितिकै सिफारिसमा महालेखा परीक्षकको कार्यालयले ५४ करोड ८९ लाख ७९ हजार रुपैयाँ बेरुजु फर्स्यौट गरिदिएको छ । समितिले ७३ करोड ५० लाख बेरुजू फर्छ्यौट गर्नका लागि सिफारिस गरेको तर केहि घटाएर बेरुजू नियमित गरिदिएको रानाभाटले बताए ।

‘बेरुजुका प्रकार छन् । असुल गर्नुपर्ने बेरुजु जसरी पनि उठाउनै पर्छ,’ उनले भने, ‘यसअघि पनि असुल गर्नुपर्ने बेरुजु बारे महानगरले खासै वास्ता गरेको छैन । तिर्नुपर्ने पनि चुपचाप छन् । त्यसैले समितिले चासो लिएको हो ।’ समितिले कार्यपालिकालाई असुलउपरका लागि चासो लिन र ताकेता गर्न निर्देशन दिएको छ ।

समितिका सदस्यहरूले बेरुजूका कारण पोखरा महानगरको बदनामी भएको र यसले दण्डहीनतालाई प्रश्रय दिएको भन्दै तत्काल बेरुजू असुलउपर गर्नुपर्नेमा जोड दिए । ‘बेरुजू तिरे ठिक छ । नभए नतिर्नेको चाहिँ सञ्चारमाध्यमबाटै तीनपुस्ते सार्वजनिक गर्न निर्देशन दिएका छौं,’ रानाभाटले भने ।