काठमाडौं । राष्ट्रिय प्रजातन्त्र पार्टीले पहिचानवादीहरुले धरानमा गोरु काटेर खाएकोप्रति आपत्ति जनाएको छ।
राप्रपामा प्रवक्ता मोहनकुमार श्रेष्ठ एक विज्ञप्ति जारी गर्दै धरानमा सार्वजनिक रुपमा गौरु काट्नु, भिडियो बनाउनु र सामाजिक सञ्जालमा पोस्ट गर्नु दुःखद् भएको बताए।
विज्ञप्तिमा भनिएको छ, ‘बहुसंख्यक हिन्दु धर्मावलम्बीको आस्था र विश्वास माथि आघात पुर्ने गरी धरानमा सार्वजनिक रुपमा गौरु काट्नु, भिडियो बनाउनु र सामाजिक सञ्जालमा पोस्ट गर्नु दुःखद् र आपत्तिजनक छ । सामाजिक सदभाव खल्बल्याउने, गरी भएका यस्ता गतिविधिप्रति राप्रपाको गम्भीर ध्यानाकर्षण भएको छ।’
आपसी एकता, सदभाव र धार्मिक सहिष्णुता नेपालको पहिचान भएको उल्लेख गर्दै सदियैँदेखि कायम रहेको नेपालको सामाजिक, धार्मिक सदभाव र एकतामा आँच आउन दिनु हुँदैन भन्नेमा राप्रपा प्रष्ट भएको जनाएको छ।
उक्त घटनाका सम्बन्धमा गम्भीर बन्न र आवश्यक तदारुकता देखाउन सरकारको गम्भीर ध्यानाकर्षण गराएको छ।
